Pandaemııaǵa baılanysty Disney-diń dúkenderi, qonaqúıleri men attraksıon parkteri jabylyp, fılmderiniń tanystyrylymy shegerilgen bolatyn. Týyndaǵan qarjylyq qıyndyqtarǵa baılanysty 5 sáýirden bastap kompanııanyń negizgi basshylarynyń eńbekaqysyn qysqartý týraly sheshim qabyldandy.
Kınopoısktiń habarlaýynsha, Disney-diń burynǵy basshysy, qazir Dırektorlar keńesiniń tóraǵasy qyzmetin atqaratyn Bob Aıger eńbekaqysynan tolyqtaı bas tartty. Al qazirgi bas dırektor Bab Chapek 50 paıyz az alýǵa kelisti.
Bob Chapek jaǵdaıǵa baılanysty qaramaǵyndaǵy qyzmetkerlerine jazǵan hatynda:
– Bárimiz bir kemedemiz, buryn kórmegen jerlermen júzip kelemiz. Osyndaı kúrdeli ýaqytta kórsetken qoldaýlaryńyzdy joǵary baǵalaımyz. Sizderdiń senimderińiz bizdi qanattandyrady. Daǵdarysty jeńip, bolashaqta burynǵydan da myqty bolatynymyzǵa senemin! – delingen.
Bob Chapektiń bazalyq eńbekaqysy 2,5 mln dollar ekenin aıta keteıik.